一碗好食既荳腐花，應該係滑、濃荳香、唔硬過石頭但又唔會一撩就散曬。有時候，要找到碗咁既荳腐花，其實都幾難。
雞屎荳花 有食唔會唔食
細細個成日都幫襯樓下街市既荳品鋪，一碗荳腐花3蚊，岩曬窮到出汁既學生當午後零食。呢碗街市荳腐花，無論係荳味、質地同口感，都係信心保証——咁差！用白色發保膠碗裝住既荳花，往往返都屋企打開時，都係D糖水瀉瀉地痴笠笠，一個羹拮落去，好似切緊蛋糕咁，勺起擺落口仲有陣雞屎味！（我未食過雞屎，但聞過陣味）而呢陣雞屎味，食到我入U個時都仲係無變…
可能你會覺得，明知難食仲食來做咩？但有時人就係咁，身邊又無更好食既荳花，而佢又平，又未難食到完全擺唔入口，仲要大平賣親和，3蚊有碗，性價比一流啦。點解唔食喎？嘿，聽落係咪有D似曾相識呢？自問有時係咪真係好想食，好鐘意食，或者會用執到寶既心態來食呢？其實都心知肚明啦…嘿。
搵到真愛
又講返食荳花，後來入到U開始拍拖，個時我同男友都無咩錢。除左大日子食下放題食下美利樓（而家去美利樓得H&M食，可惜），其餘日子都係搵D平靚正既美食。食好野，係我倆既窮風流。有一次，我地一放學就入元朗搵食（大學生無錢但有青春，大把時間浪費），誤打誤撞係一間叫「阿玉荳腐花」坐低左。
「阿玉」既小店窄長，老闆係鋪口右邊不斷勺荳花，鋪頭左邊擺左幾張摺桌同幾張膠凳，一直由鋪口擺到鋪盡頭，天花板有幾把風扇個頭拎下拎下。鋪面坐位有限，好多顧客都會選擇外賣，門口通常都有條小人龍等拎走。當時係炎夏，可想而知坐係無冷氣既鋪仔到食，個種火燒身既感覺係幾難以忘懷，個刻真係覺得姐吃的不是荳花，是汗水。
「阿玉」賣既荳花有兩種味道，一是黃荳、一是黑荳。我揀左雜誌推介味道既隔離來食，即係貴一蚊既黑荳花。顧名思義，碗荳花係用黑荳整，樣子睇來灰灰地，用一個瓷碗送上，桌面上有糖水，黃糖同姜汁任加。
第一啖食黑荳「阿玉」，我就知道搵到真愛了。呢碗荳花，賣6蚊，比街市既雞屎荳花剛好貴一倍，但佢無論係荳味、質地同口感，都同雞屎荳花有雲泥之別，而個種好係無法量化。我不但食唔到好大陣既石膏粉味，仲有十分香濃荳味，而爽滑既質地，每一羹擺入口都好似錫緊BB仔既面珠。就算一路食一路流汗都好，我望望男朋友，又聞下碗荳花既香氣，個一刻，我知道真愛就係眼前了，幾辛苦都值得。啖荳花順住咽喉而下，直通內心再慢慢…慢慢…化開…
Katy
Perry
自此之後，我就無食過雞屎荳花，就算佢幾就手都好。有時經過街市，就會不期然想起曾經同我共患難既雞屎荳花，就會不期然諗起Katy Perry 一句歌詞「Once you’ve
tasted the perfection, comparison is easily done」，真係只能對雞屎荳花說聲抱歉。
可惜不是你
出左社會後，總算經濟能力好D，我終於試左好多人熱推既「木桶荳腐花」。可惜，呢個荳花整體始終稍遜「阿玉」：荳味差過「阿玉」少少，質地硬少少，又係差過「阿玉」少少…所有野都幾好，但就係差少少。明明有所野都唔錯，但就係唔知邊到出錯。味道算幾好啦，裝潢比起「阿玉」不知好上幾多，價錢算過得去，到底仲差D咩呢？個次係同女友人去，我地既話題由學業轉移到講返工老細有幾刻薄，由感情有問題講到「無問題」，講下單身女人點樣活得多自在。係呀，因為同我一起「阿玉」既人，已經去左同人食拉麵。
後來，「阿玉」分店開到去荃灣，有段日子我竟然唔敢食，真係鬼崇至極！每次行過川龍街，望一望，深呼吸幾下，緊攥著手中幾個銀仔，就決定都係唔食。萬一我食唔返最初放入口個種味道，咁我就連唯一全港最好食既荳花都失去埋，咁咪弊？！
留言
張貼留言